فزورة أنا مين… نجمة لا حصلت ولا هتحصل زى ما قالها الأستاذ

يقدم “اليوم السابع “على مدار شهر رمضان فزورة عن نجم من نجوم زمان عبارة عن معلومات عن حياته ومسيرته المهنية، وذلك من خلال تليفزيون “اليوم السابع” وسنتلقى إجابتكم على حل الفزورة، التي تذاع يوم الإثنين والأربعاء والجمعة طوال شهر رمضان الجارى.

فزورة اليوم عن نجمة لا حصلت ولا هتحصل زى ما قالها الأستاذ، كانت هى فاكهة رمضان والحاجة الحلوة اللى كنا بنستناها من السنة للسنة، شقاوتها وخفة دمها خطفت قلوبنا لدرجة إننا مكناش بنقوم من قدام التليفزيون في رمضان عشانها.

من صغرها وهي بتعشق الرقص والغناء لدرجة إنها سافرت باريس مخصوص عشان تتعلم الرقص، اكتشفها الفنان الراحل عبدالحليم حافظ بسبب صداقته بأخوها العازف المشهور وبعدها أصبحت واحدة من أهم فنانات الإستعراضات في مصر، لدرجة إن  كل المخرجين والمنتجين كانوا بيتخانقوا عليها .

كل رمضان كنا بنستناها، أصل رمضان ماينفعش يعدى  من غير مانشوف طلتها على الشاشة وهى بتقولنا حاجات ومحتاجات تحيرنا بيها طول رمضان.

وبرغم إنها كانت بتفرحنا كلنا في رمضان لكن حياتها صعبة جداً من طفولتها واتعرضت لحادثة كبيرة، وبعدها بفترة جالها مرض خطير واتحرمنا من شقاوتها وحركاتها وبرغم كل ده هى لسه زى ما هى في عنينا فلة وفللى .

قولنا هى مين وإيه أكتر أعمال حبيتها ليها.. و توتة توتة خلصت الفزورة.